Deputeti nga Lidhja Demokratike e Kosovës (LDK), Avdullah Hoti ka reaguar pas mospjesëmarrjes së kryeminsitrit të Kosovës, Albin Kurti në takimin përgatitor në Tiranë për Procesin e Berlinit.

Hoti përmes një postimi në Facebook, e ka quajtur këtë veprim “heqje dorë nga obligimet shtetërore dhe tallje me aspiratat e popullit të Kosovës për integrim evropian”, shkruan Arbresh.info.

“Procesi i Berlinit është përcaktuar për integrimin e gjashtë vendeve të Ballkanit Perëndimor në BE. Që nga fillimi i tij në vitin 2014, dakordimet e arritura në takimet vjetore të Procesit të Berlinit kanë qenë përcaktuese për progresin e vendeve të Ballkanit Perëndimor drejt BE-së. Bazuar në ato dakordime, janë marrë vendimet përkatëse të institucioneve të BE-së dhe vendeve anëtare karshi vendeve të Ballkanit Perëndimor. Për Kosovën ka qenë tepër e rëndësishme pjesëmarrja në këtë mekanizëm, mbi baza të barabarta si çdo vend tjetër, duke qenë faktor përcaktues për progresin në integrimin e rajonit së tërësi në BE. “, ka shkruar Hoti në Facebook.

Deputeti opozitar ka thënë se për Kryeministrin e Kosovës, Albin Kurti nuk ka asnjë takim më të rëndësishëm se ky në Tiranë teksa shtoi se mospjesëmarrja është mungesë respekti për Tiranën dhe Procesin e Berlinit.

Tutje ai e quajti mospjesëmarrjen heqje dorë nga obligimet shtetërore të Kosovës ashtu si dhe tallje me aspiratat e popullit të Kosovës për integrim evropian.

“Mospjesëmarrja në këtë takim tregon mungesë serioziteti dhe respekti të Kryeministrit për Tiranën dhe për Procesin e Berlinit.”, shkroi ai.

“Mospjesëmarrja në këtë takim është heqje dorë nga obligimet shtetërore të Kosovës.”, shtoi ai.

“Mospjesëmarrja në këtë takim është tallje me aspiratat e popullit të Kosovës për integrim evropian.”, përfundoi Hoti./Arbresh.info